ترەمپ: "جەنگ لەگەڵ ئێران بە خێرایی تەواو دەبێت"

سەرۆکی ئەمریکا دۆناڵد ترەمپ ڕایگەیاند کە ئەرکی ئەوان ڕێگریی بووە لە خواستی ئێران بۆ بەدەستهێنانی چەکی ناوەکی و گوتی: "ئەو دۆخە زۆر بە خێرایی تەواو دەبێت".

دۆناڵد ترەمپ بەر لە جێهێشتنی کۆشکی سپی بەرەو تەکساس، قسەی بۆ میدیاکاران کرد.

ترەمپ لەوەڵامی پرسیارێکدا لەبارەی نرخی بەنزین لە ئەمریکا ڕایگەیاند کە لەگەڵ کۆتاییهاتنی جەنگ لەگەڵ ئێران، نرخی سووتەمەنی بە خێرایی دادەبەزێت.

دۆناڵد ترەمپ ڕاشیگەیاند کە ئەوان ڕێگە بە ئێران نادەن چەکی ناوەکی هەبێت و گوتیشی: "لە بنەڕەتدا ئەو ئەرکەمان بە کۆتا هێنا. ئێمە سوپای ئەوانمان تێکشکاند. ئەو دۆخە زۆر بە خێرایی تەواو دەبێت، کاتێک ئەوە ڕوویدا، نرخی نەوت بە خێراییەکی زۆر دادەبەزێت".

هەڵسەنگاندنی ترەمپ بۆ هاوپەیمانی مەککە

سەرۆکی ئەمریکا هەروەها لەبارەی بڕیاری تورکیا و پاکستان و سعوودیە بۆ جێگیرکردن و بەهێزکردنی توانا سەربازییەکان لە سعوودیە قسەی کرد.

کاتێک پرسیار لە دۆناڵد ترەمپ کرا کە "تورکیا و پاکستان ڕێککەوتوون لەژێر ناوی هاوپەیمانی مەککە هێزی سەربازیی ڕەوانەی سعوودیە بکەن. بۆچوونی ئێوە چییە؟" گوتی: "ئەم وڵاتانە دەیانەوێ یارمەتی سعوودیە بدەن و من پێم وایە کە ئەوە زۆر باشە".