پارتی لەگەڵ لایەنە کریستیانەکان کۆدەبێتەوە

هەولێر - AA

پارتی دیموکراتی کوردستان لە درێژەی سەردان و کۆبوونەوەکانی لەگەڵ حزب و لایەنە سیاسییەکانی ھەرێمی کوردستان، بڕیارە ئەمڕۆ چوارشەممە سەردانی حزب و لایەنە کریستیانەکان بکات.

بەمەبەستی پتەوکردنی پەیوەندییەکانیان بەتایبەت دوای ھەڵبژاردنە پێشوەختەکەی عێراق، پارتی دیموکراتی کوردستان سەردانی بۆ لای حزب و لایەنە سیاسییەکانی کوردستانی دەست پێ کردووە و لەم چوارچێوەیەش بڕیارە ئەمڕۆ چوارشەممە، سەردانی ھەریەک لە ئەنجوومەنی گەلی کلدانی، حزبی بەیت نەھرەین، قەوارەی شلاما، بزووتنەوەی گردبوونەوەی سریانی، رێکخراوی کلد و ئاشووری، حزبی یەکێتیی دیموکراتیی کلدانی، رابیتەی کلدانی و پارتی بەیت نەھرەینی نیشتمانیی بکات.

دوێنێ سێشەممە، شاندەکەی پارتی دیموکراتی کوردستان سەردانی ھەریەک لە بزووتنەوەی ئیسلامیی کوردستان و حزبی شیوعیی عێراقی کرد و جەختیان لە پتەوکردنی پەیوەندییەکانییان کردەوە.

شاندەکەی پارتی دیموکراتی کوردستان پێکھاتووە لە سکرتێری مەکتەبی سیاسیی ئەو حزبە، فازڵ میرانی و ئەندامی مەکتەبی سیاسیی، مەحمود محەممەد و ئەندامانی سەرکردایەتی، پشتیوان سادق، عەلی حوسێن و دڵشاد شەھاب.