هه‌ولێر.. حه‌فت تووشبوو به‌ ڤایرۆسی كۆرۆنا چاكبوونه‌وه‌

هه‌ولێر - AA

بەڕێوەبەری گشتی تەندروستی ھەولێر دکتۆر دلۆڤان محەمەدفاتیح جەلال لە بڵاویکردەوە کە حەفت تووشبوو بە ڤایرۆسی کۆرۆنای نوێ، دوای وەرگرتنی چارەسەری پێویست و پشکنینی کۆتایی کە ئەنجامەکانییان نێگەتیڤ بوون، رەوانەی ماڵەوە کرانەوە.

بەڕێوەبەری گشتی تەندروستی ھەولێر، دکتۆر دلۆڤان محەمەدفاتیح جەلال ئەوەیشی خستووەتەڕوو کە ژمارەی ئەو کەسانەی لە ھەولێر چاکبوونەتەوە بووەتە ١٢٥ کەس.

بەپێی داتاکانی وەزارەتی تەندروستیی ھەرێمی کوردستان کۆی گشتی تووشبووان لە ھەرێمی کوردستان لە ئێستادا بریتیە لە ٣٣٧ حاڵەت، لەو ژمارەیەش ١٦٩ لە ھەولێر، ١٣١ لە سلێمانی، ١٥ لە دھۆک و ٢٢ حاڵەت لە ھەڵەبجە تۆمارکراون و چوار حاڵەتی گیانلەدەستدانیش لە سلێمانی ھەبووە.

کۆی ئەوانەی چاکبوونەتەوە بریتیین لە ٢٦٧ کەس و لەو ژمارەیەش ١٢٥ لە ھەولێر، ١١٦ لە سلێمانی، ١٢ لە دھۆک و ١٤ کەسیش لە پارێزگای ھەڵەبجە، دوای وەرگرتنی چارەسەر و پشکنینی کۆتایی، گەڕاونەتەوە ناو خێزانەکانییان.

کۆی ئەو کەسانەیشی کە لە نەخۆشخانەکان لە ژێر چاودێری پزیشکیدان بریتییە لە ٦٧ کەس، لەو ژمارەیەش ٤٤ لە ھەولێر، ١١ لە سلێمانی، سێ لە دھۆک و ھەشت کەسیش لە ھەڵەبجە لە نەخۆشخانەکان ماونەتەوە.