Вучиќ разговараше со Вархеји: Србија подготвена за нови чекори кон ЕУ

БЕЛГРАД (АА) - Српскиот претседател Александар Вучиќ денес разговараше со европскиот комесар за соседство и проширување Оливер Вархеји, јавува Анадолу.

Состанокот се одржа пред работниот ручек што претседателката на Европската комисија, Урсула фон дер Лајен, го закажа со лидерите од Западен Балкан.

Вучиќ на социјалните мрежи објави дека имал „добар и отворен разговор со искрениот пријател на Србија“, комесарот Вархеји, за напредокот на Србија во процесот на пристапните преговори со Европската Унија (ЕУ), спроведувањето на реформската агенда и имплементацијата на европскиот План за раст за Западен Балкан.

„Повторив дека Србија суштински и технички е подготвена за нови чекори за приближување и членство во ЕУ, особено кога станува збор за владеењето на правото, економската и социјалната интеграција и му се заблагодарив на еврокомесарот за неговата поддршка на тој пат. Ја искористив можноста да го информирам комесарот за загрижувачката ситуација во Косово и Метохија и побарав поактивна вклученост на европските институции во заштитата на правата на српскиот народ“, рече Вучиќ.

Тој додаде дека му се заблагодарил за неговото лично заложување и придонес за европскиот пат на Србија за време на неговиот мандат како комесар за проширување и му посакал успех во новиот ресор, за кој е предложен, во следниот состав на Европската комисија.