Хрватска и Бугарија блокираа над 35 тони пиперки од Северна Македонија и Албанија поради пестициди

Надлежните органи во Хрватска и во Бугарија блокираа над 35 тони пиперки со потекло од Северна Македонија и Албанија откако лабораториските анализи покажале нивоа на пестициди што не ги исполнувале соодветните барања, пренесува Анадолу.

Според локалните медиуми, во Хрватска се уништени 14,7 тони црвени пиперки со потекло од Албанија откако анализите покажале концентрација од 0,050 милиграми на еден килограм од фунгицидот проквиназид, чија употреба не е дозволена кај пиперките.

Претходно, на 7 септември, друга пратка поминала преку трговец од Северна Македонија, кој ги купил пиперките од албански земјоделец со цел повторно да ги извезе во Хрватска, а според известување, тој не бил запознаен со нивото на пестициди во производот.

Во меѓувреме, се известува дека бугарските власти во рок од еден месец запреле две пратки со вкупно над 21 тон пиперки со потекло од Северна Македонија поради високи нивоа на пестициди.

Во последниот случај Бугарската агенција за безбедност на храната запрела 9,5 тони пиперки, кои се очекува да бидат уништени, а во август друга пратка од 11,6 тони била вратена во Северна Македонија.

Двата случаја биле откриени по извршени контроли и лабораториски анализи на производите.