Кина и САД се договорија за заемно намалување на царините за стоки во вредност од 30 милијарди долари

Кина и САД се договорија за заемно намалување на царините за увоз во вредност од околу 30 милијарди долари, при што за околу 90 % од опфатените производи ќе важат царинските стапки според принципот на „најповластена земја“, потврди денес кинеското Министерство за трговија, пренесува Анадолу.

Договорот е еден од резултатите на економските и трговските консултации одржани од кинеските и американските тимови во Њујорк и Вашингтон во периодот од 20 до 23 септември, соопшти Министерството денес.

Двете страни ќе го спроведат намалувањето на царините истовремено, откако ќе ги завршат процедурите предвидени со нивните национални закони, се наведува во соопштението.

Кина и САД исто така се договорија да формираат билатерален трговски совет во рамките на нивниот механизам за економски и трговски консултации, чија примарна задача ќе биде олеснување на билатералната трговија.

Царините за извоз на американски јаглен во Кина ќе бидат вклучени во рамката за заемно намалување на царините во вредност од 30 милијарди долари, што, според кинеското Министерство, ќе го олесни кинескиот увоз на американски јаглен во 2027 и 2028 година.

Двете земји се договорија и за формирање совет за инвестиции и работна група за земјоделство, со кои заеднички ќе раководат кинеското Министерство за трговија и Канцеларијата на американскиот трговски претставник. Се очекува работната група за земјоделство да ја одржи својата прва средба пред крајот на 2026 година.

Министерството соопшти дека двете страни постигнале и начелен договор за финансиските услуги и воспоставиле дијалог за вештачка интелигенција, предводен од кинескиот вицепремиер Хе Лифенг и американскиот секретар за финансии Скот Бесент.

Следниот дијалог за вештачката интелигенција се очекува пред крајот на ноември, а двете страни се договорија и да воспостават канал за комуникација за инциденти поврзани со вештачката интелигенција.