Украинската економија со пад од 29,1 отсто во 2022 година

БЕРЛИН (АА) – Украинскиот бруто-домашен производ (БДП) во 2022 година падна за 29,1 отсто поради војната со Русија што започна во февруари минатата година и сериозно ја оштети инфраструктурата и ги наруши економските активности на земјата, пренесува Анадолу.

Податоците на украинската Служба за статистика објавени доцна синоќа се пониски од предвидувањето на експертите, кои очекуваа економски пад од 40 до 50 отсто во 2022 година.

Бруто-домашниот производ (БДП) на земјата пораснал за 3,4 отсто, на околу 200 милијарди долари во 2021 година, според податоците на Светската банка.

Заедничкиот извештај што го подготвија украинската Влада, Европскиот совет и Светската банка покажа дека процесот на закрепнување на земјата ќе чини 349 милијарди долари, 1,5 пати повеќе од БДП на земјата.

И покрај Договорот за пренос на жито преку Црно Море, кој му помогна на земјоделскиот сектор на Украина, извозот на земјоделски производи сè уште е далеку под нивото од пред војната.

Украинската Влада зависи од десетици милијарди долари странска помош од западните земји.