„Европа има воена политика“

БЕРЛИН (АА) - Унгарскиот премиер Виктор Орбан вчера изјави дека Европа, исто така, има „политика на војна“ кога се осврна на тековната војна меѓу Русија и Украина, сугерирајќи дека е вистинско време да се премине од политика на војна на политика на мир, јавува Анадолу.

Во интервјуто за „Билд“ и „Велт“ Орбан го критикуваше ставот на Европа за војната и рече:

„Жал ми е што мора да го кажам ова, но Европа има и воена политика.“

Тој го повика континентот да „води автономна политика“ од Соединетите Американски Држави (САД) бидејќи „вистинските жртви на двете завојувани страни се европската економија и европското население“.

Истакнувајќи дека верува дека ќе нема фронтално решение на конфликтот меѓу Русија и Украина, унгарскиот лидер нагласи:

„Луѓе, ние, светот сакаме мир. Престанете да се убивате едни со други. Да започнеме преговори или барем да разбереме дека нема решение на теренот.“

Зборувајќи за посетите на Киев и на Москва, тој рече дека имал можност да разговара со претседателите на Украина и на Русија.

Тој посочи дека е вистинско време да се премине од политика на војна во политика на мир.

„Главен аргумент е дека човечкиот живот не треба да се троши залудно“, предложи тој, наведувајќи дека тоа е најважна морална мотивација.

„Но тоа е во интерес на Европа бидејќи ова што се случува овде е многу лошо за нас“, рече тој.

Тој изјави дека многу европски политичари „веднаш сакаат решение што не постои“.

„Патот кон мирот започнува кога оние што се во војна или блиску до војна сакаат мир. Војната не паѓа од небо. Војната е резултат на одлуките на одредени луѓе. Затоа треба да ги најдеме овие светски лидери“, рече тој и праша што прават Кина, САД и Европската Унија.

Тој наведе дека Кина има мировен план, Америка има воена политика, а „Европа само ја копира американската позиција наместо да има свој стратегиски пристап“.

Орбан тврди дека војната никогаш немаше да се случи доколку поранешната германска канцеларка Ангела Меркел останеше на таа позиција „затоа што имаше способност, разбирање и вештина да ги изолира конфликтите што се лоши за Европа“.