Британскиот премиер Барнам ќе го посети Киев на својата првата странска посета по преземањето на функцијата

Британскиот премиер Енди Барнам денес ќе го посети Киев во рамките на првата странска посета откако ја презеде функцијата, повторно потврдувајќи ја поддршката на Велика Британија за Украина, која ја одбележува 35-годишнината од независноста од Советскиот Сојуз, објавија повеќе британски медиуми, пренесува Анадолу.

Би-би-си објави дека Барнам ќе се сретне со украинскиот претседател Владимир Зеленски и ќе претседава со својот прв состанок на „коалицијата на подготвените“, формирана од Франција и Велика Британија под водство на поранешниот премиер Кир Стармер. Исто така, се очекува тој да прими награда во име на британскиот народ како признание за поддршката на Велика Британија за Украина.

„На 35-годишнината од независноста на Украина, украинскиот народ не треба да има никакво сомнение: Велика Британија е со вас денес и ќе биде со вас колку што е потребно“, изјави Барнам во пресрет на посетата. „Русија не треба да има никакво сомнение во нашата решителност. Нема да отстапиме сè додека не се постигне праведен и траен мир.“

Исто така, се очекува Владата да објави дека одбранбената компанија МБДА може да декласифицира информации за британските компоненти што се користат во ракетата со долг дострел „Сторм шедоу“, овозможувајќи ѝ на Украина да продолжи со домашно производство на нејзиниот француски еквивалент „Скалп-ЕГ“.

Оружјето, со дострел од околу 150 милји (241 километар), е користено против силно утврдени цели на окупираната украинска територија и во Русија.

Посетата на Барнам се реализира во услови на засилени руски напади врз Украина и зголемени тензии меѓу Москва и Лондон. Неодамна Русија предупреди на „последици“ поради беспилотните летала од британско производство што се користат во украинските напади врз руска територија.

Москва, исто така, потврди дека нејзиниот амбасадор во Велика Британија, Андреј Келин, ја напуштил функцијата по седум години. Руското Министерство за надворешни работи ја обвини Велика Британија дека следи „пат на конфронтација“, додека претставник на НАТО за „Телеграф“ изјави дека Русија ги засилила кампањите за дестабилизација против сојузниците преку кибернапади, обиди за атентат и саботажи.

„НАТО продолжува да ја зајакнува својата отпорност и ги применува и унапредува алатките што ни се на располагање за справување со хибридните дејствувања“, изјави претставникот.

„Во секоја фаза ќе обезбедиме Алијансата да биде подготвена да одврати и да се брани од секоја закана и да ги заштити нашите една милијарда граѓани.“