Ikrame Imane Kouachi
23 Септември 2026•Ажурирано: 23 Септември 2026
Лидерот на израелската опозиција Јаир Лапид денес изјави дека Израел се соочува со „сериозна дипломатска криза“ во услови на меѓународни критики поради ескалацијата на насилството од страна на доселениците на окупираниот Западен Брег, пренесува Анадолу.
Лапид во објавата на американската платформа за социјални медиуми Х, ги коментираше изјавите на францускиот претседател Емануел Макрон за ситуацијата на окупираниот Западен Брег.
Макрон вчера ја критикуваше ескалацијата на насилството од страна на израелските доселеници на окупираниот Западен Брег во својот говор на отворањето на 81. заседание на Генералното собрание на ОН во Њујорк.
Тој рече дека дејствата на доселениците „го лишуваат палестинскиот народ од неговото легитимно право на постоење“.
Исто така, Макрон рече дека мировните напори во Појасот Газа „не успеаја да отворат ниеден хуманитарен коридор“, опишувајќи ја ситуацијата како нешто „што треба да ги засрами сите“.
Лапид, критикувајќи го Нетанјаху, рече: „Улогата на премиерот не е да објавува на социјалните мрежи, туку да ја промени реалноста.“
„Се наоѓаме во сериозна дипломатска криза што веќе ја загрозува безбедноста на Израел. Она што е направено досега не успеа, а тоа е факт што не може да се оспори“, рече тој.
„Што добивме? Само уште пропаганда за изборите“, додаде Лапид.
Израел треба да одржи парламентарни избори на 27 октомври, при што анкетите на јавното мислење покажуваат дека опозицискиот блок има предност пред коалицијата на Нетанјаху, а ниедна од страните не располага со доволно пратенички места за формирање влада.
Нетанјаху ја предводи актуелната Влада од декември 2022 година.
Тој се соочува со обвиненија за корупција, а Меѓународниот кривичен суд издаде налог за негово апсење поради наводни воени злосторства и злосторства против човештвото во Појасот Газа.
