Пожар во логистички центар на „Вајлдберис“ во Русија по украински напад со беспилотни летала

Пожар избувна во логистички центар на компанијата „Вајлдберис“ во рускиот град Екатеринбург откако остатоци од украински дрон го погодиле објектот, соопштија локалните власти, јавува Анадолу.

Гувернерот на Свердловската Област, Денис Паслер, на Телеграм објави дека руската противвоздушна одбрана соборила осум беспилотни летала над регионот, при што три паднале врз покривот на логистичкиот центар.

„Луѓето се евакуирани, нема повредени“, наведе Паслер.

Од „Вајлдберис“ соопштија преку Телеграм дека пожарникарите интервенираат на местото на пожарот што, според компанијата, бил предизвикан од нападот.

„Објектот беше евакуиран однапред. Во моментов испораките се привремено ограничени и се пренасочуваат кон други објекти“, соопшти компанијата.

Во меѓувреме, руското Министерство за одбрана соопшти дека неговите сили собориле 203 украински беспилотни летала над територијата на Руската Федерација, анектираниот Крим и над Црното Море.

Министерството, исто така, тврди дека во текот на ноќта извршило напади врз поморски пловни објекти што ги користела украинската војска и погодило три товарни брода што превезувале воен товар по Црно Море.

Независна потврда на тврдењата на двете страни е тешка поради тековната војна.

Украина од средината на јули ги засили нападите со беспилотни летала врз логистичките капацитети на „Вајлдберис“, најголема руска платформа за онлајн трговија.

Од 18 јули досега украински беспилотни летала нападнале повеќе од 15 логистички центри на „Вајлдберис“ во Русија, вклучително и објекти во Московската, Тамбовската, Ленинградската, Краснодарската, Волгоградската и Ставрополската Област, како и на Крим, кој Русија го анектираше во 2014 година.

Киев ја обвинува компанијата дека има улога во рускиот воен синџир за снабдување, а Москва и „Вајлдберис“ тврдат дека станува збор за исклучиво цивилни објекти.