Сирискиот суд осуди братучед на Асад на смрт за злосторства против човештвото

Сирискиот суд денес го осуди Васим ал-Асад, братучед на соборениот претседател Башар ал-Асад, на смрт за злосторства против човештвото, објави новинската агенција САНА, пренесува Анадолу.

Четвртиот кривичен суд во Дамаск, исто така, нареди конфискација на неговиот движен и недвижен имот во корист на државата.

Пресудата беше донесена за време на шестото судско рочиште против Васим, кој се соочи со неколку обвиненија, вклучително и формирање и водење нерегуларни вооружени групи од почетокот на 2011 година по наредба на бригадниот генерал Гиат Дала, командант на бригада во Четвртата дивизија, која ја водеше братот на Ал-Асад, Махер.

Според САНА, групите учествувале во воени операции насочени кон цивилни области во Источна Гута во Југозападна Сирија, особено градот Млеиха, што резултирало со цивилни жртви.

Васим, исто така, се соочи со обвиненија за трговија со дрога и убиство со умисла.

Тој беше уапсен од сириските безбедносни сили на 21 јуни 2025 година, во близина на сириско-либанската граница. Неговото судење започна на 24 јуни.

Минатата недела сирискиот суд ги осуди во отсуство Асад и неговиот брат Махер на смрт откако донесе пресуда за извршени злосторства против човештвото и други прекршоци.

Ал-Асад, кој владееше со Сирија речиси 25 години, избега во Русија на 8 декември 2024 година, со што заврши децениското владеење на партијата Баас, кое започна во 1963 година. Во јануари 2025 година беше формирана преодна администрација предводена од претседателот Ахмед ал-Шара.