Трамп: Иран никогаш не смее да се здобие со нуклеарно оружје

Американскиот претседател Доналд Трамп повтори дека на Иран никогаш не смее да му се дозволи да се здобие со нуклеарно оружје, опишувајќи го раководството на земјата како „многу насилни, зли луѓе“, пренесува Анадолу.

„Не може да им дозволите да имаат нуклеарно оружје, а тие нема да имаат нуклеарно оружје“, изјави Трамп за „Фокс њуз“ во интервјуто објавено во неделата.

Тој оцени дека Техеран би употребил нуклеарно оружје доколку го поседува, тврдејќи дека Блискиот Исток „во суштина би исчезнал“, а Израел би бил уништен, при што САД или Европа би можеле да бидат следни цели.

„Ако јас не бев претседател, Израел ќе исчезнеше. Немаше да има Израел. А веројатно немаше да има ниту Блиски Исток“, додаде тој.

Трамп, исто така, изјави дека САД му нанесуваат значителна штета на Иран и го пофали, како што го опиша, ефикасниот блокаден режим врз Иран.

„Одлично работиме. Блокадата беше неверојатна… ги напаѓаме многу силно. Никој никогаш не бил вака погоден“, рече тој.

Трамп го нарече Иран „земја во пропаѓање“ и изјави дека бил изненаден кога Техеран почнал да ги таргетира земјите од заливот на почетокот на војната.

„Сите беа шокирани. Јас бев изненаден“, рече тој, додавајќи дека смета оти нападите довеле до тоа Иран да ја загуби поддршката.

Трамп, исто така, ги обвини демократите дека сакаат САД да ги загубат војните против Иран и Венецуела, додавајќи дека тоа нема да се случи бидејќи земјата „апсолутно лесно победува“.