Балони за шверц од Белорусија го нарушија авионскиот сообраќај на аеродромот во Вилнус

Работењето на Меѓународниот аеродром во Вилнус, Литванија, привремено беше нарушено поради сомнителни балони за шверц што влегле од соседна Белорусија, објавија локалните медиуми денес, пренесува Анадолу.

Ограничувањата во воздушниот простор биле воведени од 23:25 часот по локално време вчера до 2:40 часот денес, објави литванскиот јавен радиодифузен сервис ЛРТ, повикувајќи се на аеродромот.

Околу 20 летови биле погодени за време на ограничувањата, а на патниците чии летови биле нарушени или откажани им било препорачано да контактираат со своите авиокомпании.

Инцидентот е прво нарушување поврзано со балони за шверц во последните неколку месеци, при што претходниот случај бил регистриран во јуни.

Работењето на аеродромот во Вилнус годинава било нарушено околу 10 пати поради слични закани.

Литванските власти ги сметаат упадите на балони што се користат за шверц на стоки преку границата за дел од „хибриден напад“ што го спроведува белоруската Влада.