Во пораст поддршката за забрана на социјалните мрежи за деца

ИСТАНБУЛ (АА) – По одлуката на Австралија да им забрани на децата под 16 години користење на социјалните мрежи, сè повеќе земји работат на слични законски решенија со цел ограничување на пристапот на младите до ваквите платформи без родителска согласност, покажуваат новите истражувања, јавува Анадолу.

Италија, Шпанија, неколку американски сојузни држави и Јужна Кореја веќе подготвуваат закони за ограничување на пристапот на младите до социјалните мрежи како Фејсбук, Инстаграм, ТикТок, Снепчет и Јутуб.

Според истражувањето „Монитор за образование 2025“ на компанијата Ипсос, 71 % од испитаниците на глобално ниво ја поддржуваат забраната за користење социјални мрежи за децата под 14 години.

Особено високи стапки на поддршка се забележани во Индонезија (87 %), Франција (85 %), Шпанија (84 %), Колумбија (82 %) и Перу (80 %).

Во Турција, 76 % од испитаниците изјавиле дека ја поддржуваат ваквата забрана, што ја рангира земјата на 11. место меѓу останатите држави.

Исто така, 55 % од учесниците на глобално ниво сметаат дека треба да се забранат паметни телефони во училиштата, при што Франција води со 80 % поддршка, по која следуваат Ирска (70 %), Шпанија (69 %), Италија (67 %) и Перу (65 %). Во Турција, само 53 % од анкетираните ја поддржуваат оваа мерка.

Мислењата се поделени кога станува збор за вештачката интелигенција (AI), како што е користењето на ЧетЏпт или слични алатки од страна на учениците. 37 % од учесниците сметаат дека вештачката интелигенција треба да биде забранета во училиштата, додека 38 % не се согласуваат со тоа.

Според извештајот „Социјалните медиуми и менталното здравје на младите“ објавен во 2023 година од Канцеларијата на советодавниот орган на Генералниот хирург на САД, зголеменото користење на социјалните мрежи меѓу младите е поврзано со раст на случаите на депресија и анксиозност.

„Адолесцентите на возраст од 10 до 19 години поминуваат низ исклучително чувствителен период на развој на мозокот“, стои во извештајот.

„Честото користење на социјалните мрежи може да предизвика промени во деловите на мозокот одговорни за емоционално учење, самоконтрола и социјално однесување, што може да ги зголеми ризиците по менталното здравје.“

Сепак, се нагласува дека социјалните мрежи имаат и потенцијални придобивки, како можноста децата и адолесцентите да создаваат и одржуваат пријателства онлајн, да се поврзуваат со различни групи врсници и да добијат психолошка поддршка преку дигитални заедници.

Истражување на Универзитетот во Калифорнија, Сан Франциско, објавено во мај годинава, покажало дека по набљудување на околу 12.000 деца во период од три години, симптомите на депресија се зголемиле кај децата на возраст од 9 до 10 години паралелно со растот на користење на социјалните мрежи.