Во САД критикуван ставот на Хилари Клинтон за геноцидот во Газа

ИСТАНБУЛ (АА) - Институтот „Лемкин“ за превенција на геноцид и човекова безбедност, со седиште во САД, упати критики кон поранешната државна секретарка на САД, Хилари Клинтон, за игнорирање на доказите што потврдуваат дека Израел врши геноцид во Газа, коментирајќи ги како „ПР-проблем“, известува Анадолу.

Институтот „Лемкин“ објави писмено соопштение во врска со говорот на Хилари Клинтон на самитот организиран од весникот „Израел Хајом“ во Њујорк на 2 декември.

Во соопштението се критикува Хилари дека наместо да ги споменува цивилните жртви во Газа, таа рекла дека Израел има „ПР-проблеми“ и дека младите Американци се под влијание на „наивна пропаганда“ на социјалните медиуми.

Институтот „Лемкин“ наведува дека овие забелешки претставуваат „јасно негирање на геноцидот“ и дека Хилари погрешно ја претставила растечката јавна загриженост во САД за постапките на Израел во Газа.

Потсетувајќи дека младите Американци биле сведоци на геноцидот на Израел преку слики објавени на интернет во текот на изминатите две години, во соопштението се додава:

„Младите луѓе во САД не се глупави или наивни. Тие едноставно не се согласуваат со геноцидот. (Поранешната) државна секретарка би можела да размисли да го стори тоа.“

Во објаснувањето во кое Хилари ја потсетуваат дека Обединетите нации, водечките групи за човекови права, меѓународните правни организации и претставниците на академската фела акциите на Израел во Газа ги опишуваат како геноцид, институтот „Лемкин“ ја повика поранешната државна секретарка на САД да го „прочита тоа“.

Во соопштението се нагласува дека никаква ПР-кампања, вклучително и големи и скапи напори, нема да го скрие фактот дека во Газа се врши геноцид и дека Хилари греши што мисли поинаку.