Германија планира да купи дополнителни 15 борбени авиони Ф-35

БЕРЛИН (АА) - Германската Влада планира да купи дополнителни 15 борбени авиони Ф-35, зголемувајќи ја планираната флота на авиони произведени во САД од 35 на 50, јавува Анадолу.

„Политико“ објави дека одлуката следува по неуспехот на Германија и Франција да ги решат несогласувањата околу европската програма за борбени авиони од следната генерација ФЦАС.

Според извештајот, ова го поттикна Берлин да набави дополнителни авиони Ф-35 за да го надмине јазот во капацитетите што произлегува од тоа.

Портпаролот на германското Министерство за одбрана, Кенет Хармс, на прашањето на новинарите за време на прес-конференцијата во Берлин, не ја потврди оваа информација.

„Во моментов нема планови во Министерството за одбрана за набавка на дополнителни авиони Ф-35 покрај оние што се веќе договорени“, изјави тој, без да даде дополнителни детали.

Германија во 2022 година, одлучи да купи 35 борбени авиони Ф-35 за да ги замени своите застарени борбени авиони „Торнадо“, кои се способни да испорачаат нуклеарни бомби и се распоредени како дел од политиката на НАТО за нуклеарно одвраќање.

Набавката ќе чини приближно 10 милијарди евра (11,7 милијарди долари).

Германските воздухопловни сили ќе ги добијат првите авиони Ф-35 во 2026 година, а обуката за пилоти и техничари ќе започне во САД.

Борбените авиони ќе бидат стационирани во воздухопловната база Бухел од 2027 година па натаму и ќе ги заменат застарените авиони „Торнадо“ до 2030 година.