Данско разузнавање: Руска инвазија на земја членка на НАТО е многу малку веројатна, но не може да се исклучи

Руска инвазија на земја членка на НАТО останува „многу малку веројатна“, но „не може да се исклучи“, соопшти денес данската Служба за одбранбено разузнавање (ДДИС) во новата процена на заканите, јавува Анадолу.

„ДДИС и понатаму не гледа никакви индикации дека Русија ќе започне целосна инвазија на една или повеќе земји членки на НАТО“, соопшти службата.

„Дури и ако Русија одлучи да изврши инвазија на земја членка на НАТО, најверојатно ќе ѝ бидат потребни најмалку шест месеци за да се подготви и да ги распредели потребните сили. Иако многу малку е веројатна руска инвазија, таа не може да се исклучи.“

Во процената се прави разлика меѓу инвазија и помала воена операција, при што се предупредува на „низок, но растечки ризик“ од ограничен руски напад врз земји членки на НАТО што се граничат со Русија. Таков напад би можел да се случи во наредните месеци дури и ако војната во Украина продолжи, се наведува во процената.

Службата наведе неколку можни форми на ограничен напад: напад врз инфраструктура што се користи за поддршка на Украина, операција со „лажно знаме“ во која би биле употребени дронови произведени во Украина или ограничено распоредување војници без национални ознаки.

„Постои ризик Русија да процени дека земјите членки на НАТО нема да одговорат колективно, особено ако Русија процени дека Соединетите Американски Држави не можат или нема да им дадат поддршка на европските земји членки на НАТО во евентуална војна со Русија.“

Службата, исто така, очекува Русија да ја засили својата хибридна кампања против НАТО и западните земји. Според неа, идните операции би можеле да вклучуваат деструктивни кибернапади што би ги нарушиле основните услуги и саботажи, со што би се создал ризик од човечки жртви.