07 Декември 2022•Ажурирај: 08 Декември 2022
КУДС (АА) - Европската Унија (ЕУ) ја замрзна соработката со израелската полиција поради загриженоста во врска со политиката на новата Влада, пренесува Агенција Анадолија (АА).
Во септември Израел и ЕУ потпишаа Нацрт-договор за подобрување на преносот на разузнавачки информации. Договорот треба да го одобри Европскиот парламент.
„ЕУ го информира израелскиот амбасадор Хаим Регев дека засега ќе престане да работи на Нацрт-договорот за разузнавачка соработка меѓу израелската полиција и Европската полициска агенција „Европол““, пишува весникот „Хаарец“, повикувајќи се на добро информирани извори.
Според весникот, на Регев му е врачено решението за одлуката за замрзнување на соработката минатиот петок.
Израелските власти за „Хаарец“ изјавија дека одлуката е прв европски показател дека промената на израелската политика на окупираниот Западен Брег ќе ѝ наштети на соработката со ЕУ.
Во понеделникот, челникот на Одделот на ЕУ за соработка на спроведувачите на законот, Роб Розенберг, истакна дека „конечниот договор може да вклучува мали исклучоци“, ограничени на „ситуацијата на материјалните закани и потребата од заштита на цивилното население“.
Според „Хаарец“, новиот договор се очекува да содржи клаузула со која ќе се спречи Израел, информациите што ќе ги добие од Европа, да ги користи на палестинските територии окупирани во 1967 година.
Меѓународното право ги смета Западниот Брег и Источен Кудс (Источен Ерусалим) како окупирани територии, и сите активности на изградба на еврејските населби на тие територии ги смета за нелегални.
Мандатарот за состав на израелската Влада, Бенјамин Нетанјаху, се согласи да му го понуди на екстремно десничарскиот политичар Итамар Бен-Гвир ресорот министер за национална безбедност во новата Влада, потег што предизвика регионална и меѓународна загриженост.
