Израелската војна го претвори градот Беит Лахија во урнатини

ГАЗА (АА) - Градот Беит Лахија во северниот дел на Појасот Газа, од кој се повлече израелската армија, е претворен во урнатини по месеци интензивно бомбардирање и судири, јавува Анадолу.

Обемната штета, особено околу болницата „Камал Адван“ и нејзината околина, беше снимена со камера на 3 јануари кога израелските сили се повлекоа од оваа област.

На 27 декември, по повторните напади, израелските сили извршија рација во „Камал Адван“ во северна Газа, го запалија и сериозно го оштетија објектот, поради што болницата мораше да прекине со работа.

Палестинскиот доктор Хусам Абу Сафија, директор на болницата, беше уапсен заедно со десетици медицински работници.

Според палестински извори, околу 350 луѓе што се наоѓале во болницата, вклучително и голем дел од медицинскиот персонал, биле уапсени од израелската армија и се наоѓаат во затвори.

Неколку меѓународни организации за човекови права, меѓу кои британската хуманитарна организација „Медицинска помош за Палестинците“ и американската организација „Доктори против геноцидот“, побараа итна акција за заштита на здравствените работници во Газа и итно ослободување на Абу Сафија и другите медицински работници.

На 19 јануари стапи на сила договор за прекин на огнот и размена на затвореници помеѓу Хамас и Израел, кој во првата фаза ќе трае 42 дена, а ќе продолжат преговорите за следните фази на договорот.

За договорот посредуваа Египет и Катар, со поддршка од САД.

Во израелската геноцидна војна, која започна на 7 октомври 2023 година, се убиени повеќе од 47.400 Палестинци, од кои повеќето се жени и деца, а повредени се над 111.000. Повеќе од 11.000 луѓе се исчезнати.

Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант поради воени злосторства и злосторства против човештвото во Газа.

Израел е обвинет за геноцид во Меѓународниот суд на правдата поради војната во Појасот Газа.