Кина се противи на израелските копнени напади врз Либан

ПЕКИНГ (АА) – Кинеските власти соопштија дека се спротивставуваат на кршењето на суверенитетот, безбедноста и територијалниот интегритет на Либан, како и на потези што поттикнуваат антагонизам и ескалација на тензиите на Блискиот Исток, јавува Анадолу.

„Пекинг е длабоко загрижен поради превирањата на Блискиот Исток“, соопшти кинеското Министерство за надворешни работи.

Пекинг реагираше на копнените операции на израелската армија во Јужен Либан, по кои следуваа ирански ракетни напади врз Израел.

„Кина ја повикува меѓународната заедница, особено големите земји со влијание, да одиграат конструктивна улога и да избегнат натамошни превирања“, се вели во соопштението.

Кина наведе дека долготрајните борби во Газа се основна причина за нова рунда превирања на Блискиот Исток и истакна дека сите страни мора итно да работат на сеопфатен и траен прекин на огнот.

Од 23 септември Израел започна масовни воздушни напади врз либанската територија, во кои се убиени повеќе од 1.000 луѓе, а 2.950 се повредени.

Во израелските напади беше убиен и лидерот на Хезболах, Хасан Насрала.