Кремљ ги отфрли тврдењата за нов бран мобилизација во Русија

Портпаролот на Кремљ, Дмитриј Песков, денес ги отфрли тврдењата за нов бран мобилизација во Русија, велејќи дека станува збор за дезинформации, јавува Анадолу.

Во интервју за РТВИ, Песков ја обвини Украина дека се обидува „идеолошки да ја дестабилизира“ ситуацијата во Русија.

„Знаете, сето ова го пласираат украинските власти“, рече тој.

„Сето тоа се само новински патки, намерно пласирани во медиумите.“

Во последните месеци, украинскиот претседател Владимир Зеленски, повикувајќи се на разузнавачки извештај, тврдеше дека Москва планира да мобилизира меѓу 300.000 и 500.000 дополнителни војници по законодавните избори во Русија во септември оваа година.

Рускиот претседател Владимир Путин во 2022 година нареди делумна воена мобилизација, во рамките на која беа повикани 300.000 резервисти.

Оттогаш Украина периодично тврди дека Русија се подготвува за нов бран мобилизација.