Маж во Мајами Бич пукал кон возило верувајќи дека патниците се Палестинци

ВАШИНГТОН (АА) - Маж, кој според наводите испукал 17 куршуми кон возило во Мајами Бич, Флорида, во саботата вечерта, изјавил пред полицијата дека пукал затоа што верувал дека патниците во возилото биле Палестинци, според она што пишува во извештајот за приведувањето на кои се повикува „Си-би-си њуз“, пренесува Анадолу.

Мордехај Брафман (27) е уапсен и обвинет за две точки за обид за убиство.

Безбедносните камери го снимиле како прави полукружно свртување на 48. Улица околу 21:30 часот (2:30 часот по Гринич во неделата), застанува пред возилото на жртвите и испукува низа куршуми со полуавтоматски пиштол.

Во полициското испрашување, Брафман изјавил дека додека го возел својот камион, ги видел двајцата Палестинци и ги застрелал и убил, се вели во извештајот за неговото приведување.

Сепак, двете жртви преживеале – едниот добил прострелна рана во рамото, додека другиот бил погоден во подлактницата.

Истражителите засега не соопштуваат дали нападот ќе биде третиран како злосторство од омраза.

Меѓутоа, огранокот на Советот за американско-исламски односи во Флорида (CAIR-Florida) бара федерални обвиненија за злосторство од омраза во врска со инцидентот.

Во изјава, директорот за комуникации на КАИР-Флорида, Вилфредо Амр Руиз, изјави дека мора да бидат подигнати обвиненија за злосторство од омраза, врз основа на изјавите на осомничениот пред полицијата, кои наводно укажуваат на „антипалестински мотив“.

„Тоа се наводните дејствија на напаѓачот, мотивирани од пристрасност, а не вистинската етничка припадност на жртвите, што треба да биде одлучувачки фактор за обвиненијата во овој вознемирувачки случај“, изјави Амр Руиз.

Брафман останува во затворскиот центар Тарнер Гилфорд Најт во округот Мајами-Дејд, според „Мајами хералд“.

Весникот, повикувајќи се на полициски извори, исто така објави дека засега не е познато дали жртвите навистина се Палестинци, но тие биле посетители од Израел.