Путин гледа можност за дипломатско решение на војната со Украина

Рускиот претседател Владимир Путин денес изјави дека гледа можност за дипломатско решение за ставање крај на војната со Украина, јавува Анадолу.

Говорејќи на Источниот економски форум во тихоокеанскиот пристаништен град Владивосток, Путин рече дека главните страни во конфликтот, Русија и Украина, треба да постигнат консензус пред другите земји да придонесат во процесот.

„Благодарни сме им на сите што се обидуваат да придонесат за решавање на ова прашање. Има ли шанси? Според мое мислење, да, има“, рече тој. „Всушност, на крајот и пред сè, овој проблем треба да го решат земјите вклучени во конфликтот. Тоа се Русија и Украина. Ова е правилен пристап“, додаде тој.

На прашањето за американското посредување во прашањата поврзани со Украина, рускиот претседател рече дека контактите меѓу Москва и Вашингтон продолжуваат, вклучително и преку разузнавачки канали.

„Во контакт сме со американската администрација. И се надевам дека овие контакти ќе продолжат и на крајот ќе доведат до позитивен резултат“, рече тој.

Осврнувајќи се на односите меѓу Русија и САД, Путин рече дека нивното обновување зависи од двете страни, додавајќи дека верува оти претседателот Доналд Трамп е позитивно настроен кон конструктивна работа.

„Колку што разбирам, чувствувам и гледам, претседателот Трамп е настроен кон таква позитивна работа“, рече тој.

Путин истакна дека Русија има многу пријатели во САД, а еден од нив е американскиот актер и режисер Стивен Сигал, кој бил присутен во салата.

Тој го нарече „пријател на Русија“ и „најдобар амбасадор на мирот“.

„Имаме многу пријатели во САД. Еден од нив е во оваа сала – господинот Стивен Сигал“, рече Путин, по што публиката аплаудираше.

- Напади врз цивилни пловни објекти -

Путин, исто така, ги критикуваше нападите и заканите поврзани со цивилни пловни објекти и авиони, велејќи дека таквите дејства ги отежнуваат изгледите за билатерални мировни преговори.

Запленувањето цивилни пловни објекти, нападите врз комерцијални бродови и заканите кон цивилни авиони тој ги опиша како „државен тероризам“.

„Дали забележавте запленување цивилни пловни објекти, напади врз цивилни трговски бродови и, згора на тоа, сега слушнавме за закани за напад врз цивилни авиони. Ова, секако, е манифестација на државен тероризам. И ова, секако, ја отежнува можноста за водење билатерални мировни преговори“, рече тој.

Путин рече дека западните сојузници на Украина, кои не реагираат на таквите дејства, стануваат „соучесници во меѓународниот тероризам“.

Исто така, тој рече дека Москва брзо развива системи за противвоздушна одбрана, истакнувајќи дека пред два дена биле одбиени сите напади врз рафинерии за нафта во Русија.

Рускиот претседател повторно ги отфрли извештаите за мобилизација во Русија, велејќи дека тие се шират со цел да се нарушат изборите за Државната дума.

„Денес не постои сценарио што би барало мобилизација“, рече тој.

Путин, исто така, рече дека руските бизнисмени неодамна уплатиле стотици милијарди рубљи во рускиот буџет преку доброволни донации, што за него било „апсолутно изненадување“.