Mustafa Deveci,Ömer Koparan
13 Јануари 2026•Ажурирај: 14 Јануари 2026
АЛЕПО/ИСТАНБУЛ (АА) - Сирија ја прогласи областа западно од реката Еуфрат, окупирана од терористичката организација ЈПГ/СДФ, за воена зона, барајќи сите вооружени елементи да се повлечат кон исток, јавува Анадолу.
Во писмено соопштение до локалните медиуми, сириската Армија соопшти дека терористичката организација ЈПГ/СДФ, заедно со терористите на ПКК и остатоците од поранешниот режим на Асад, продолжуваат да распоредуваат сили на окупираните територии западно од Еуфрат.
Во соопштението се додава дека овие окупирани области се користени за напади врз Алепо со камикази-дронови.
Бидејќи терористичката организација распоредува сили во овие области и ги користи за напади со беспилотни летала врз Алепо, Армијата ги прогласи окупираните области западно од Еуфрат за воена зона и побара од терористичките елементи да се повлечат источно од реката Еуфрат, се вели во соопштението.
Мапа објавена заедно со соопштението ги означи регионите, вклучувајќи ги Мескене и Деир Хафир, повикувајќи ги цивилите да се држат подалеку од местата контролирани од терористичката организација.
Според официјалните бројки, од минатата недела, СДФ гранатираше станбени населби, цивилни објекти и позиции на сириската Армија во Алепо, при што се убиени 24 лица, беа ранети речиси 130 и беа раселени околу 165.000 жители од областите Ашрафие и Шеик Максуд.
Во март 2025 година, сириското претседателство објави потпишување на договор за интеграција на СДФ во државните институции, потврдувајќи го територијалното единство на земјата и отфрлајќи ги сите обиди за поделба.
Во април 2025 година, сириските власти потпишаа договор со СДФ во врска со населбите Шеик Максуд и Ашрафие, во кој се предвидува дека двете подрачја ќе се сметаат за административни делови на градот Алепо, почитувајќи ги нивните локални обележја.
Договорот, исто така, вклучуваше одредби за забрана на вооружени манифестации, ограничување на оружјето само за внатрешните безбедносни сили и барање за повлекување на СДФ во областите источно од реката Еуфрат во североисточна Сирија.
Но, властите соопштија дека во месеците потоа, СДФ не покажале никакви напори за исполнување на условите од договорите.
Сириската Влада ги интензивираше напорите за одржување на безбедноста низ целата земја по соборувањето на режимот на Асад во декември 2024 година, по 24 години на власт.
