Шпанија го осуди упадот на израелскиот министер Бен-Гвир во Ал Акса

МАДРИД (АА) - Шпанската Влада го осуди упадот на израелскиот министер за национална безбедност Итамар Бен-Гвир во комплексот на џамијата Ал Акса во окупираниот Источен Ерусалим/Ал Кудс, јавува Анадолу.

Вчера, министерот на крајната десница, заедно со повеќе од 2.000 радикални Израелци, упадна во комплексот Ал Акса.

Насобраните Израелци се молеа во комплексот, вееја знамиња и ја пееја националната химна и покрај тоа што еврејските верски права се забранети на ова свето место.

„Наша политика е да овозможиме изведување еврејска молитва“, рече Бен-Гвир при влегувањето во Ал Акса и вети дека ќе го „победи Хамас“ во Газа.

Шпанското Министерство за надворешни работи оваа провокација ја нарече „неприфатливо кршење на историскиот статус кво на светите места во Ерусалим“.

Израелците, кои вчера го узурпираа светото место, од утринските часови во големи групи влегуваа во Ал Акса под заштита на израелската полиција.

Израелските групи повикаа на упади во Ал Акса по повод еврејскиот верски празник Тиша Б'Ава.

За време на еврејските верски денови и празници дополнително се зголемува бројот на упади во Ал Акса.

По Мека и Медина, џамијата Ал Акса е трето најсвето место во светот за муслиманите. Евреите го нарекуваат Храмова Гора комплексот на џамијата Ал Акса, а некои веруваат дека таму некогаш се наоѓале два древни еврејски храма.

Израел го окупираше Источен Ал-Кудс/Ерусалим за време на Арапско-израелската војна во 1967 година. Тој го анектираше целиот град во 1980 година во потег што никогаш не беше признат од меѓународната заедница.