Handan Kazancı
29 Септември 2023•Ажурирај: 01 Октомври 2023
ИЗМИР (АА) - Целта на Туркије е да го надмине моменталниот извоз од секторот на одбранбената индустрија до цифра од над 6 милијарди долари оваа година, изјави претседателот на Туркије, Реџеп Таип Ердоган, јавува Анадолу.
„Со нашите иницијативи во одбранбената индустрија, нашиот извоз се зголемува експоненцијално“, рече Ердоган на обраќањето на ТЕХНОФЕСТ во Измир, кој се одржува на аеродромот „Чигли“.
„Туркије прецизно, беспрекорно спроведува 850 проекти во одбранбената индустрија“, додаде тој.
Петдневниот голем фестивал на воздухопловството и технологијата во Туркије, ТЕХНОФЕСТ, започна во средата и вклучува натпревари, авиошоуа, презентации и работилници, а посетителите можат да ги искусат вертикалните тунели на ветер, разни симулации и планетариумски презентации.
Настанот од 2018 година се одржува секоја година во организација на Турската фондација за технологија (Т3) и турското Министерство за индустрија и технологија, во соработка со други министерства и десетици други државни институции, приватни компании и универзитети.
Ердоган истакна дека досега најголемиот технолошки настан во Туркије го посетиле околу 330.000 посетители.
„Верувам дека фестивалот ќе биде настан достоен за Измир и 100-годишнината од нашата република во секој поглед“, рече турскиот претседател.
Агенција Анадолу е глобален комуникациски партнер на ТЕХНОФЕСТ уште од неговото прво издание.
Настанот претходно се одржуваше во различни турски градови во парните години, а во метрополата Истанбул во непарните години.
По повод 100-годишнината од основањето на Република Туркије, настанот беше планиран во три различни области оваа година.
Првото издание на настанот оваа година се одржа на аеродромот „Ататурк“ во Истанбул во мај, каде што беше постигнат светски рекорд од 2,2 милиони посетители.
Вториот ТЕХНОФЕСТ годинава се одржа од 30 август до 3 септември во главниот град Анкара, привлекувајќи речиси 1 милион луѓе.
