Турција го осуди упадот на израелски екстремистички групи во џамијата Ал Акса

Турција вчера остро го осуди упадот на екстремистички израелски групи во џамијата Ал Акса во Ерусалим, под заштита на израелските окупациски сили, повикувајќи ја меѓународната заедница да преземе мерки за одвраќање на Израел, јавува Анадолу.

Во соопштение, турското Министерство за надворешни работи ја обвини Владата на израелскиот премиер Бенјамин Нетанјаху дека настојува дополнително да ги заостри регионалните тензии и, преку прекршувања и провокации насочени кон муслиманските свети места, да ги поткопа напорите за унапредување на мирот и стабилноста.

„Јасно е дека Владата на Нетанјаху има цел дополнително да ги разгорува тензиите во регионот и да ги поткопува напорите за мир и стабилност преку своите прекршувања и провокации насочени кон муслиманските свети места“, соопшти Министерството.

Анкара, исто така, го повтори својот повик до меѓународната заедница да преземе мерки за одвраќање на израелските постапки со кои се нарушува историскиот и правниот статус на џамијата Ал Акса.