دوو ملیۆن دۆز ڤاکسین گەیشتە عێراق

ھەولێر ــ AA

وەزارەتی تەندروستیی و ژینگەی عێراق گەیشتنی گەورەترین کاروانی ڤاکسینی کۆرۆنا لە جۆرەکانی فایزەر و سینۆفارم کە ژمارەیان دوو ملیۆن دۆزە، راگەیاند.

وەزارەتی تەندروستیی و ژینگەی عێراق لە راگەیەنراوێکدا ئاماژەی بەوەداوە کە ئەمڕۆ یەکشەممە، کاروانێکی دیکەی ڤاکسینی کۆرۆنا لە جۆرەکانی فایزەر و سینۆفارم، گەیشتووە کە ژمارەیان دوو ملیۆن دۆزە و ھاتووە:

"ڤاکسینەکان بەسەر سەرجەم بنکە و فەرمانگە تەندروستییەکان لە پارێزگاکانی عێراق و ھەرێمی کوردستان دابەش دەکرێن".

ئەمەیش لە کاتێکدایە کە تا دوێنێ شەممە، دوو ملیۆن و ١٠٢ ھەزار و ٥٥٠ کەس لە عێراق، دۆزی یەکەم و دووەمی ڤاکسینی کۆرۆنایان وەرگرتبوو.