لاڤرۆڤ: "رووسیا وه‌ڵامی ناتۆ و وڵاتانی یه‌كێتیی ئه‌ورووپا ده‌داته‌وه‌".

مۆسكۆ- AA

وه‌زیری ده‌ره‌وه‌ی رووسیا، سێرگی لاڤرۆڤ، دیپۆرتكردنه‌وه‌ی دیپلۆماته‌كانی وڵاته‌كه‌ی له‌لایه‌ن ئه‌ندامانی ناتۆ و وڵاتانی یه‌كێتیی ئه‌ورووپاوه‌ به‌ 'بێڕێزییه‌كی گه‌وره‌' ناوبرد و ئاماژه‌ی به‌وه‌كرد رووسیا وه‌ڵامی له‌وباره‌یه‌وه‌ ده‌بێت.

سێرگی لاڤرۆڤ له‌ تاسكه‌نتی پایته‌ختی ئۆزبه‌كستان وه‌ڵامی پرسیاری رۆژنانه‌وانانی سه‌باره‌ت به‌ دیپۆرتكردنه‌وه‌ی دیپلۆماته‌كانی وڵاته‌كه‌ی له‌لایه‌ن ئه‌ندامانی ناتۆ و وڵاتانی یه‌كێتیی ئه‌ورووپاوه‌، دایه‌وه‌.

لاڤرۆڤ باسی له‌وه‌كرد پێشتر له‌لایه‌ن وه‌زاره‌ته‌كه‌یان و كرملینه‌وه‌ له‌وباره‌یه‌وه‌ روونكردنه‌وه‌ بڵاوكراوه‌ته‌وه‌ و كرده‌وه‌ی وڵاتانی خۆرئاوا بێ وه‌ڵام ناهێڵنه‌وه‌.

راشیگه‌یاند: "وه‌ڵام ده‌ده‌ینه‌وه‌، بێخه‌مبن. هیچ كه‌سێك خوازیاری ئه‌وه‌ نییه‌ له‌به‌رامبه‌ر ئه‌و بێڕێزییه‌ گه‌وره‌یه‌دا ئارام بگرێت".

وه‌زیری ده‌ره‌وه‌ی رووسیا بانگه‌شه‌ی ئه‌وه‌یكرد كه‌ دیپۆرتكردنه‌وه‌ی دیپلۆماته‌كانیان له‌لایه‌ن واشنتۆنه‌وه‌ ئامڕازێكه‌ به‌مه‌به‌ستی درووستكردنی فشار و ئه‌نجامدانی شانتاژ له‌سه‌ر ئاستی نێوده‌وڵه‌تی به‌كارده‌هێنرێت.