Курти: Србија и Русија ќе се обидат да ја искористат пресудата од Хаг против Косово

Премиерот на Косово, Албин Курти, изјави дека Србија и Русија ќе се обидат да ја искористат против Косово пресудата на Специјализираните совети во Хаг за четворицата поранешни лидери на Ослободителната војска на Косово (ОВК), но дека тоа нема да им биде лесно, јавува Анадолу.

На прес-конференцијата по денешната седница на Владата, Курти рече дека пресудата на Специјализираните совети ги отфрли наводите за таканаречената „Жолта куќа“ и трговијата со органи, како и обвинението за злосторства против човештвото.

Тој рече дека Косово сега треба да спроведе заедничка кампања во областа на јавната дипломатија.

„Бидејќи, секако, ќе има обиди од Србија и Русија пресудата на Специјализираните совети да се искористи против Република Косово. Иако е јасно дека тоа нема да им биде лесно како што мислеле бидејќи, пред сѐ, таканаречената ‘Жолта куќа’ и наводната трговија со органи не стигнаа ниту до обвинението, а камоли до пресудата“, рече Курти.

Тој додаде дека тоа, меѓу другото, е резултат и на извештајот на Клинт Вилијамсон, во кој се наведува дека нема „Жолта куќа“ ниту трговија со органи.

Курти рече дека пресудата на Специјализираните совети, во споредба со извештајот на Вилијамсон, исто така, утврдила дека не биле докажани злосторства против човештвото, ниту широко распространето и систематско насилство и прогон на цивилното население.

„Значи, ОВК не направила нешто такво“, додаде Курти.

Клинт Вилијамсон е американски обвинител што ја предводеше Специјалната истражна работна група на Европската Унија (ЕУ), формирана за истражување на наводите од извештајот на Дик Марти од 2010 година за трговија со органи од страна на ОВК во таканаречената „Жолта куќа“ во Албанија.

На 16 септември Специјализираните совети ги осудија Хашим Тачи и Јакуп Красниќи на по 25 години затвор, Кадри Весели на 18 години и Реџеп Селими на 13 години. Четворицата поранешни лидери на ОВК беа прогласени за виновни за воени злосторства, меѓу кои незаконско или произволно притворање, сурово постапување, тортура и незаконски убиства.

По пресудата, во Косово и во други земји каде што живеат Албанци се одржуваат протести. На 28 септември Собранието на Косово усвои декларација со која се отфрла констатацијата за постоење заедничка криминална цел кај четворицата осудени на првостепено ниво.

Покрај тоа, Демократската партија на Косово (ПДК) побара усвојување измени на Законот за Специјализираните совети, со кои, меѓу другото, би се ограничил мандатот на овој суд.

ПДК го услови усвојувањето на законските измени со својата поддршка за изборот на нов претседател на земјата. Движењето Самоопределување, како најголема партија во Собранието, не може да го избере претседателот без поддршка од пратениците на опозицијата.