Во Белград започна 20. Годишен состанок на министрите за земјоделство од Југоисточна Европа

Во Белград денес започна 20. Годишен состанок на министрите за земјоделство од Југоисточна Европа (ЈИЕ), посветен на напредокот во однос на Заедничката земјоделска политика на ЕУ (CAP), програмата ИПАРД и европските интеграции, јавува Анадолу.

На јубилејниот 20. Годишен состанок учествуваат министри и шефови на делегации од земјите од ЈИЕ, амбасадори, дипломатски претставници, како и претставници на Европската комисија и меѓународни и регионални организации, меѓу кои Организацијата за храна и земјоделство на Обединетите нации (ФАО), Германското друштво за меѓународна соработка (ГИЗ) и Советот за регионална соработка (РЦЦ).

Состанокот го отвори српскиот министер за земјоделство, шумарство и водостопанство во технички мандат, Драган Гламочиќ, објави „Танјуг“.

Како што беше истакнато на отворањето, јубилејниот 20. Годишен состанок на министрите за земјоделство од ЈИЕ претставува можност за разговори на високо ниво за иднината на земјоделството и руралниот развој.

Беше истакнато и дека Србија го презема претседавањето со Постојаната работна група за регионален рурален развој на земјите од ЈИЕ (SWG), со што презема важна улога во понатамошното насочување на регионалниот дијалог и соработката во областа на земјоделството и руралниот развој.

Состанокот е организиран под заедничко покровителство на Министерството за земјоделство, шумарство и водостопанство на Србија и Постојаната работна група за регионален рурален развој во ЈИЕ (SWG).