Bojana Stojanovic
28 Октомври 2020•Ажурирај: 29 Октомври 2020
БЕЛГРАД
Пратениците на Собранието на Србија ја изгласаа новата Влада, на чело со премиерката Ана Брнабиќ, која ќе има 21 министерство, односно три нови ресори, јавува Агенција Анадолија (АА).
За новата Влада гласаа 227 пратеници, додека против беа пет.
Брнабиќ пред гласањето вети дека веќе во првите 100 дена работа на Владата ќе се видат конкретните резултати кои „многумина ги очекуваат".
„Ќе продолжиме да работиме веднаш на акционите планови кои треба да ги усвоиме, на нацртите на законите кои треба да ги усвоиме, за да на конкретен начин работиме на подобрувањето на животот на граѓаните", рече Брнабиќ.
Таа најави и дека утре во осум часот ќе биде одржана првата седница на Владата на Србија во новиот состав.
Министерот за надворешни работи е досегашниот генерален секретар на претседателот на Србија Никола Селаковиќ. Министер за внатрешни работи е досегашниот министер за одбрана Александар Вулин, за министерка за трговија, туризам и телекомуникации избрана е досегашната државна секретарка на тоа министерство Татјана Матиќ.
Министер за сообраќај, градежништво и инфраструктура е генералниот директор на хотелот „Мона" Томислав Момировиќ, министер за финансии останува Синиша Мали, за министерка за стопанство избрана е директорката на ППТ „Наменска" во Трстеник Анѓелка Атанасковиќ, министер за земјоделство, водостопанство и шумарство останува Бранислав Недимовиќ.
За министерка за заштита на животната средина предложена е досегашната претседателка на општината Савски венец Ирена Вујовиќ, за министерка за рударство и енергетика избрана е досегашната министерка за сообраќај, градежништво и инфраструктура Зорана Михајловиќ. Министерка за правда е Маја Поповиќ, а министерка за државна управа и локална самоуправа е Марија Обрадовиќ.
За министер за одбрана избран е досегашниот министер за внатрешни работи Небојша Стефановиќ. Министерка за култура и информирање е досегашната претседателка на Собранието, Маја Гојковиќ.
За министерка за труд, вработување, боречки и социјални прашања изгласана е Дарија Кисиќ Тепавчевиќ, министер за здравство останува Златибор Лончар, како и министерот за спорт и млади Вања Удовчиќ.
Досегашниот министер за државна управа и локална самоуправа на Србија Бранко Ружиќ избран е за министер за образование, наука и технолошки развој, додека Јадранка Јоксимовиќ останува министерка за евроинтеграции.
Новите три министерства, односно Министерството за грижа за селата ќе го води Милан Кркобабиќ, министерката за човекови и малцински права и општествен дијалог е донеодамнешната пратеничка од опозициската Демократска партија Гордана Чомиќ, а за министер за грижа за семејство и демографија избран е Ратко Дмитровиќ од Српскиот патриотски сојуз (СПАС).
