Северна Македонија: Поради коронавирусот одложени предвремените парламентарни избори закажани за 12 април

СКОПЈЕ (АА) - Лидерите на политичките партии во Северна Македонија се согласија предвремените парламентарни избори кои беа закажани за 12 април оваа година, да бидат одложени, без да го одредат датумот на нивното одржување поради ситуацијата предизвикана од коронавирусот (Ковид-19), јавува Агенција Анадолија (АА).

Ова беше соопштено по лидерската средба иницирана од претседателот на Северна Македонија Стево Пендаровски. Средбата се одржа во претседателскат „Вила Водно“ во Скопје, на која присуствуваа и претседателот на Собранието Талат Џафери и премиерот Оливер Спасовски.

На состанокот присуствуваа и претседателот на Социјалдемократскиот сојуз на Македонија (СДСМ), Зоран Заев, претседателот на ВМРО-ДПМНЕ, Христијан Мицкоски, Бујар Османи и Изет Меџити како претставници на Демократската унија за интеграција (ДУИ), претседателот на Алтернатива, Африм Гаши, претседателот на Алијансата за Албанците, Зијадин Села, претседателот Движењето БЕСА, Билал Касами, како и Орхан Ибраими и Фримзим Даути од Демократската партија на Албанците.