Талат Џафери ја објасни постапката за уставните измени

СКОПЈЕ (АА) - Претседателот на Собранието на Северна Македонија, Талат Џафери, изрази подготвеност да ја започне собраниската постапка за уставните измени, веднаш откако Владата ќе ја поднесе иницијативата до Собранието, јавува Анадолу.

Според одобрената преговарачка рамка, Северна Македонија мора да усвои уставни измени за интеграција во Европската Унија (ЕУ), според кои неколку малцинства, вклучително и бугарското малцинство, мора да бидат вклучени во Уставот.

Со одобрувањето на преговарачката рамка во јули минатата година, на Северна Македонија ѝ беше отворена вратата за полноправно членство во ЕУ, бидејќи тоа претходно беше спречено од Бугарија, земја членка на ЕУ.

Работната група при Министерството за правда минатата недела ја одобри предлог-иницијативата за потребата од измени на Уставот и предлогот го достави до Владата, која ќе треба да ја проследи иницијативата до Собранието.

Работната група се состоеше од повеќе од 20 правни експерти, а беа поканети да учествуваат сите политички партии.

Претседателот на Собранието, Талат Џафери, објасни дека иницијативата за уставни измени мора да ги помине сите процедури и рокови предвидени во Деловникот за работа на Собранието. Тој на средба со новинарите рече дека ќе бидат потребни неколку месеци за да се поминат сите собраниски процедури, додавајќи дека тоа зависи и од времетраењето на дискусиите за амандманите.

Потсетувајќи на претходната постапка кога земјата го смени името по потпишувањето на Преспанскиот договор со Грција, по што беше овозможено членство во НАТО, Џафери рече дека тогаш биле потребни околу 4 и пол месеци. Според него, ова било „оптимално“ времетраење, со оглед на тоа што немало расправи по амандмани.

За усвојување на уставните измени потребни се 2/3 од гласовите, односно 80 од вкупно 120 пратеници во Собранието на Северна Македонија. Исто така, бидејќи измените ги засегаат националните малцинства, ќе биде потребно двојно гласање според Бадентеровиот принцип.

Власта не успеа да ги обезбеди потребните гласови бидејќи парламентарната опозиција се спротивставува на уставните измени, велејќи дека нема да гласаат за уставни измени во овој парламентарен состав.