Кина откри 100 милиони тони резерви на нафта во Јужното Кинеско Море

АНКАРА (АА) - Кинеската национална нафтена корпорација (CNOOC) откри нафтено поле со резерви од 100 милиони тони во источниот дел на Јужното Кинеско Море, објави денес компанијата, пренесува Анадолу.

Новите резерви се пронајдени во јужното нафтено поле Каипинг, 300 километри од брегот на провинцијата Гуангдонг на југот на земјата.

Преку континуираното истражување, докажаните резерви во јужното нафтено поле Каипинг достигнаа 102 милиони тони еквивалент на нафта.

Бунарот би давал просечно приближно 7.680 барели сурова нафта и 0,52 милиони кубни стапки природен гас дневно.

„Јужното нафтено поле Каипинг е првото кинеско нафтено поле во длабоки води со докажани резерви од над сто милиони тони“, рече Ксу Чанггуи, заменик-главен директор за истражување на CNOOC.

„Компанијата останува посветена на истражување и развој на ресурсите на нафта и гас во Јужното Кинеско Море, со што континуирано го подобрува капацитетот за снабдување со енергија“, рече Џоу Ксинхуаи, извршен директор и претседател на компанијата.

CNOOC има за цел во 2024 година да произведе 700 до 720 милиони барели еквивалент на нафта, при што 69 отсто доаѓаат од Кина, а остатокот од операции во странство.