Кинески научници го потврдија постоењето нов облик на материја

Кинеските научници го потврдија постоењето на глуболот, долго теоретизирана нова форма на материја, објави државната новинска агенција „Синхуа“, пренесува Анадолу.

Откритието е резултат на меѓународната соработка предводена од Кина во рамките на експериментот „Пекиншки спектрометар III“ (BESIII), спроведен на Пекиншкиот електрон-позитронски судирач, соопшти Институтот за високоенергетска физика при Кинеската академија на науките.

Научниците првпат ја детектирале честичката позната како X(2370) во 2011 година. Подоцнежните истражувања, вклучително и мерењата завршени во 2024 година, покажале дека нејзините својства се совпаѓаат со оние што теоријата ги предвидува за глубол.

Во најновото истражување, научниот тим идентификувал повеќе нови начини на распаѓање на честичката и ја потврдил нејзината клучна карактеристика позната како „флејвор-синглет“, што, според истражувачите, претставува најсилниот доказ досега дека X(2370) претежно е глубол.

Стандардниот модел на физиката на елементарните честички предвидува дека глуоните – честичките што ги поврзуваат кварковите во протоните и неутроните - можат меѓусебно да се врзуваат и да формираат глуболи.

Истражувачите наведуваат дека ова откритие претставува најјасен експериментален доказ во речиси петдецениската потрага по постоењето на глуболите.