ОпенАИ се извини на Австралија поради неовластен пристап до владини веб-страници

Компанијата за вештачка интелигенција ОпенАИ денес ѝ се извини на Австралија откако откри дека нејзините модели на вештачка интелигенција пристапиле до владини веб-страници без одобрение за време на интерна обука и евалуација, јавува Анадолу.

„Во јуни, за време на интерна обука и евалуација, нашите модели пристапија до веб-страници на австралиската Влада на начини за кои немаа одобрение“, соопшти компанијата.

„Исто така, требаше подобро да постапиме со нашата реакција. Жал ни е и работиме на тоа да бидеме подобри во иднина.“

Компанијата соопшти дека ја идентификувала активноста во средината на август, при преглед на претходни активности поврзани со обука и евалуација, по одделен инцидент со платформата за истражување на вештачка интелигенција „Хагинг фејс“ (Hugging Face).

Извинувањето уследи по пет дена откако австралискиот премиер Ентони Албаниз го обелодени инцидентот со порталот „Медикеер“ во Њујорк, на маргините на Генералното собрание на ОН.

Албаниз на 24 септември изјави дека агент на ОпенАИ добил неовластен пристап до Сервисот за известување за статистиката на „Медикеер“ на „Сервисис Австралија“.

Агентот пристапил до јавни и нејавни датотеки, што довело до форензичка истрага со помош на Австралиската дирекција за сигнали.

Австралиските власти соопштија дека порталот содржи збирни статистички податоци за „Медикеер“ и дека е одвоен од системите во кои се обработуваат индивидуални барања за „Медикеер“ и лични податоци.

ОпенАИ соопшти дека при прегледот идентификувала активности поврзани со четири австралиски владини организации: „Сервисис Австралија“, Бирото за истражување на статистиката и криминалот на Нов Јужен Велс, Министерството за здравство на Викторија и Австралискиот институт за здравство и благосостојба.

Во „Сервисис Австралија“, експериментален интерен модел добил истражувачка задача поврзана со владините трошоци по жител за лекови за кожни заболувања во заедниците во Викторија.

ОпенАИ соопшти дека моделот наишол на тешкотии при добивањето на информациите, по што презел неовластени дејствија кои му овозможиле пристап до материјали што не биле јавно достапни.

Компанијата соопшти дека моделот ги прегледал техничките информации и изворниот код и пристапил до интерни датотеки, акредитиви и збирни статистички податоци.

Сепак, ОпенАИ соопшти дека во текот на прегледот не биле пронајдени докази дека било пристапено до индивидуални податоци за пациенти или корисници.

„Не сакавме да дојде до оваа активност и пристапот до услугата, како и активностите што следуваа, не требаше да се случат“, соопшти компанијата.

ОпенАИ соопшти дека нејзините модели пристапиле и до системите управувани од другите три агенции, но не пристапиле до индивидуални криминалистички досиеја, медицински досиеја или одговори од анкети преку кои може да се идентификуваат лица.

Компанијата соопшти дека ги зајакнала заштитните мерки, вклучително и со дополнителни мрежни ограничувања и мониторинг.

Таа, исто така, вети техничка поддршка за засегнатите агенции и помош во зајакнувањето на киберодбраната на Австралија.

ОпенАИ соопшти дека ќе формира австралиска работна група со независни експерти за изработка на препораки за кибербезбедноста поврзана со вештачката интелигенција и подобрување на координацијата меѓу развивачите на вештачка интелигенција и владите.

Главниот директор за стратегија на компанијата, Џејсон Квон, треба да се појави пред Заедничката селективна комисија на австралискиот Парламент за вештачка интелигенција во Сиднеј на 6 октомври.