Riyaz Khaliq Khaliq
03 Ноември 2025•Ажурирај: 03 Ноември 2025
ИСТАНБУЛ (AA) – Кина денес го осуди насилството врз цивилите во Судан откако паравоените Сили за брза поддршка (РСФ) ја презедоа контролата врз градот Ел-Фашер во државата Северен Дарфур и извршија масакри врз цивилното население, јавува Анадолу.
„Пекинг внимателно ја следи ситуацијата во Судан и ги осудува нападите врз цивилите“, изјави портпаролката на кинеското Министерство за надворешни работи, Мао Нинг, на прес-конференцијата во Пекинг.
Таа изрази надеж дека „Судан ќе го прекине конфликтот колку што е можно поскоро, ќе ја олесни хуманитарната криза, ќе го продолжи политичкиот процес во најкраток можен рок и ќе воспостави мир, стабилност и ќе овозможи обнова и развој“.
Според локални и меѓународни организации, на 26 октомври РСФ ја презеде контролата врз Ел-Фашер и изврши масакри врз цивили, а експертите предупредуваат дека нападот може дополнително да ја продлабочи географската поделба на Судан.
Подоцна лидерот на РСФ, Мухамед Хамдан Дагало, познат како Хемедти, призна дека неговите сили извршиле „прекршувања“ во Ел-Фашер, додавајќи дека се формирани истражни комисии.
Од 15 април 2023 година суданската армија и паравоените сили РСФ се во вооружен конфликт, кој досега не успеаја да го прекинат ниту регионалните ниту меѓународните посредувања. Во конфликтот загинаа 20.000 лица, а повеќе од 15 милиони луѓе се раселени или станале бегалци, според извештаите на Обединетите нации и локалните организации.
