УКМТО: Пријавени две жртви во безбедносен инцидент со танкер во Ормускиот Теснец

Две жртви се пријавени во безбедносен инцидент во кој бил вклучен танкер во Ормускиот Теснец претходно оваа недела, соопшти денес Британската организација за поморски трговски операции (УКМТО), јавува Анадолу.

Во соопштението УКМТО наведе дека добила потврдена информација за танкер вклучен во безбедносен инцидент на стратегискиот пловен пат.

Инцидентот бил пријавен во понеделникот во 20:50 часот по Гринич, се наведува.

УКМТО соопшти дека во инцидентот имало две жртви, но не прецизираше дали станува збор за загинати или повредени лица.

Не е пријавено влијание врз животната средина, додаде организацијата.

Надлежните органи го истражуваат инцидентот, а пловните објекти се советуваат да пловат низ областа со претпазливост и во УКМТО да пријавуваат каква било сомнителна активност.

Агенцијата не го идентификуваше танкерот ниту даде дополнителни детали за природата или причината за инцидентот.

Националната бродска компанија на Саудиска Арабија, „Бахри“, денес соопшти дека двајца филипински морнари загинале во безбедносен инцидент во кој бил вклучен нејзиниот нафтен танкер „Сидр“, додека во понеделникот минувал низ Ормускиот Теснец.

„Бахри“ соопшти дека инцидентот се случил околу 23:40 часот по локално време, што е приближно времето што е наведено во извештајот на УКМТО.