Германија: Коментарите на Трамп за Зеленски се „погрешни и опасни“

БЕРЛИН (АА) - Германскиот канцелар Олаф Шолц ги опиша како „погрешни и опасни“ коментарите на американскиот претседател Доналд Трамп за украинскиот претседател Владимир Зеленски, известува Анадолу.

„Негирањето на демократскиот легитимитет на Зеленски со еден збор е погрешно и опасно“, изјави Олаф Шолц за списанието „Дер шпигел“.

„Точно е дека Владимир Зеленски е избран претседател на Украина. Фактот дека не е можно да се одржат соодветни избори среде војна е во согласност со украинскиот Устав и изборните закони. Никој не треба да тврди поинаку“, рече Шолц.

Наведувајќи дека Русија под водство на претседателот Владимир Путин ја започна војната во Украина, Шолц додаде: „Украина се брани од руската агресија речиси три години.“

- Шефицата на германската дипломатија Баербок рече дека се бесмислени коментарите на Трамп

Министерката за надворешни работи на Германија, Аналена Баербок, за телевизијата ЗДФ изјави: „Ова навистина е бесмислено“, категорично отфрлајќи ги коментарите на Трамп.

„Ако го погледнете реалниот свет, без само брзо да твитате, знаете кои се луѓето во Европа што, за жал, мора да живеат под диктаторски услови. (Тоа се) Луѓе во Русија, во Белорусија“, рече Баербок.

Наведувајќи дека Украинците секој ден се борат за својата слободна демократија, Баербок продолжи со зборовите:

„Како Европејци, ние ги поддржуваме на патот кон Европската Унија за да можеме заедно да ја обезбедиме нашата демократија.“

Американскиот претседател Доналд Трамп го критикуваше Зеленски што не одржува избори во неговата земја, велејќи: „Зеленски, диктатор кој не одржува избори, подобро да дејствува брзо, инаку ќе ја загуби својата држава.“