Havva Kara Aydın
03 Август 2020•Ажурирај: 04 Август 2020
АНКАРА
Иранските власти вчера објавија дека вовеле економски санкции кон поранешен американски експерт кој игра активна улога во Вашингтонскиот „економски тероризам против интересите на Исламската Република и нејзините граѓани, јавува Агенција Анадолија (АА).
Ричард Голдберг, поранешен член на Советот за национална безбедност на Белата куќа, сега работи со Фондацијата за одбрана на демократиите (FDD), истражувачки центар во Вашингтон.
Тој беше ставен на листата на санкции во согласност со Законот за борба против кршењето на човековите права и терористички активности на САД во регионот, донесен од страна на иранскиот парламент во 2017 година, се вели во соопштението на Министерството за надворешни работи на земјата.
„За да се постигнат целите на гореспоменатиот закон со воведување санкции за американски лица кои се активно вклучени во економски тероризам против интересите на владата и граѓаните на Исламската Република Иран, Ричард Голдберг, поврзан со FDD и поранешен помошник на поранешниот советник за национална безбедност на САД, Џон Болтон, ќе биде ставен под санкции утврдени со членовите 6 до 8 од споменатиот закон“, се вели во соопштението.
Голдберг, познат како еден од координаторите на политиката за „максимален притисок“ што беше спроведена против Иран по пристигнувањето на американскиот претседател Доналд Трамп, ја напушти својата работа во Советот за национална безбедност во јануари.
Економските санкции и пандемијата на Ковид-19 зададоа двоен удар врз кревката економија на Иран.
Во последните неколку недели и месеци, валутата на Иран остро падна, постојано губејќи вредност во однос на доларот, што резултираше во огромни зголемувања на цените и разочарувачко незадоволство.
Цените на основните производи исто така се зголемени во последните неколку месеци, за што експертите велат дека тоа делумно се должи на санкциите на САД, ограничувањата поради вирусот и затворањето на границите.
Иранскиот претседател Хасан Рухани се обиде да ја смири загриженоста во врска со економските тешкотии, велејќи дека големиот народ на Иран нема да „клекне“ пред своите проблеми.
