Иранската ИРГЦ тврди дека американски персонал е убиен и дронови се уништени во напад врз воздухопловната база во Кувајт

Иранскиот Корпус на исламската револуционерна гарда (ИРГЦ) тврди дека американски персонал е убиен и дронови се уништени во напад со проектили и беспилотни летала врз воздухопловната база Али ал Салем во Кувајт, пренесува Анадолу.

Во соопштението, ИРГЦ рече дека нивните копнени сили извршиле комбиниран напад со проектили и беспилотни летала врз штабот и капацитетите на американскиот командант во базата, тврдејќи дека „голем број“ американски персонал е убиен.

Исто така, се тврди дека од нападот се запалил хангар за дронови и рампа за распоредување на дронови и дека се уништени неколку дронови за кои се наведува дека учествувале во нападите против Иран.

ИРГЦ соопшти дека нападот бил извршен истовремено со нападите врз американските бази во Јордан, Бахреин и Ербил.

Се наведува дека нападот е одмазда за американскиот напад врз станбена куќа во Сирик во јужен Иран еден ден претходно, за кој, како што тврди, биле гаѓани речиси 70 луѓе, а четворица се убиени, вклучително и едно дете.

Обраќајќи ѝ се на кувајтската јавност, ИРГЦ истакна дека нападот бил насочен кон американското воено присуство во Кувајт, а не кон кувајтскиот народ и повика на отстранување на американските сили од земјата.

Американската централна команда (ЦЕНТКОМ) доцна синоќа објави дека започнала напади врз цели на ИРГЦ во Иран.

По објавата, иранските медиуми јавија за експлозии на островот Кешм, како и во Бандар Абас, Сирик, Чабахар и Конарак.