Mücahithan Avcıoğlu
06 Август 2026•Ажурирано: 06 Август 2026
Осум водечки меѓународни поморски здруженија ги повикаа Обединетите нации да се спротивстават на воведувањето задолжителни такси или надоместоци за бродовите што пловат низ Ормускиот Теснец, јавува Анадолу.
Во заедничко отворено писмо упатено до генералниот секретар на ОН, Антонио Гутереш, и генералниот секретар на Меѓународната поморска организација (IMO), Арсенио Домингез, здруженијата предупредуваат дека таквите давачки би го загрозиле непреченото пловење и би имале негативни последици врз светската економија
Писмото било испратено во понеделникот, а објавено вчера од страна на Меѓународната комора за бродски превоз.
„Воведувањето задолжителни надоместоци за транзит или такси за услуги што практично претставуваат патарина низ Ормускиот Теснец би било значително отстапување од воспоставената меѓународна практика“, се наведува во писмото.
Здруженијата предупредуваат дека дозволувањето вакви давачки би можело да создаде преседан за слични мерки и на други меѓународни морски патишта, со што би се ослабела меѓународно признаената правна рамка што го регулира правото на транзит.
Дополнителните трошоци за поморски транспорт би се пренеле низ глобалните синџири на снабдување, што би довело до повисоки цени на превозот и енергијата, зголемена инфлација и поголема економска неизвесност, се додава во писмото.
Потписници на писмото се Азиската асоцијација на бродосопственици, BIMCO (Балтички и меѓународен поморски совет), Меѓународната асоцијација на крузерски компании, Европската асоцијација на бродосопственици, Меѓународната комора за бродски превоз, ИНТЕРКАРГО (Меѓународна асоцијација на сопственици на бродови за сув товар), ИНТЕРТАНКО (Меѓународна асоцијација на независни сопственици на танкери) и Светскиот поморски совет.
Организациите исто така нагласија дека безбедноста на морнарите и непреченото пловење не смеат да бидат загрозени за време на преговорите за регионалната безбедност и решавањето на конфликтите.
Писмото следува откако Иран и Оман вчера постигнаа прелиминарно разбирање за речиси сите прашања поврзани со идниот режим на Ормускиот Теснец. Заменик-министерот за надворешни работи на Иран, Казем Гарибабади, изјави дека конечниот договор е „на чекор до финализирање“.
Според него, разбирањето ги опфаќа локациите на влезните и излезните поморски рути, но нагласи дека тоа „не значи целосно отворање на Ормускиот Теснец“.
Тој додаде дека станува збор за „нов и поинаков модел во споредба со практиката што важеше во изминатите 60 години“.
Советот на Меѓународната поморска организација во јули соопшти дека, согласно со меѓународното право, пловидбата низ Ормускиот Теснец треба да остане ослободена од такси и други давачки.
Воедно, Советот истакна дека секој договор меѓу крајбрежните држави во регионот мора да обезбеди недискриминаторски и непречен транзит за сите бродови низ меѓународно признатите пловни коридори.
Ормускиот Теснец е едно од најважните светски поморски теснеци, кој го поврзува Персискиот Залив со Оманскиот Залив и светските пазари, поради што секое нарушување на комерцијалниот поморски сообраќај претставува сериозен ризик за глобалното снабдување со енергенси и меѓународната трговија.
