Министрите за надворешни работи на земјите членки на НАТО се состанаа во Брисел

БРИСЕЛ (АА) - Министрите за надворешни работи на земјите членки на НАТО се собраа во Брисел за да разговараат за прашањата за Украина, Западен Балкан, Кина и Блискиот Исток, известува Анадолу.

На дневен ред на состанокот на министрите за надворешни работи на НАТО се ситуацијата во Украина, која е во војна со Русија, оценка за условите што Киев мора да ги исполни за членство во НАТО и поддршката што треба да ѝ се даде на Украина, случувањата на Западен Балкан, предизвиците што ги носи подемот на Кина и случувањата на Блискиот Исток, особено во Појасот Газа.

Во рамките на дводневниот состанок на министрите, утре за првпат ќе се состане Советот НАТО - Украина на ниво на министри за надворешни работи. Советот, што е формиран на самитот на НАТО во Вилнус, а првиот состанок беше одржан на ниво на шефови на држави и влади, се состана двапати на ниво на амбасадори и еднаш на ниво на министри за одбрана.

На министерскиот состанок присуствува и министерот за надворешни работи на Шведска, чиј процес за членство во НАТО е во тек. Покрај тоа, на една од седниците во рамките на состанокот ќе присуствува и високиот претставник на Европската Унија за надворешни работи и безбедност, Жосеп Борел.