Неколку лица повредени во напад со меч во училиште во шведскиот град Фагерста

Неколку лица се повредени откако лице вооружено со меч влегло во училиште во Фагерста, во централна Шведска, објавија јавниот радиодифузер СВТ и општината, јавува Анадолу.

Полицијата и службите за итна помош биле повикани во училиштето „Бринел“ во 14:06 часот по локално време (12:06 часот по Гринич), според Општина Фагерста.

Од Општината соопштија дека напаѓачот е во полициски притвор и дека полицајците го пребаруваат училиштето.

„Имаме тековна операција во областа и тоа е сѐ што можеме да кажеме во моментов“, изјави Пеле Вамстад, портпарол на полицијата.

На местото на настанот биле распоредени амбулантни возила, полициски единици, полициски хеликоптер и полициски тим за интервенција.

По инцидентот, неколку училишта и објекти во Фагерста биле ставени под блокада, меѓу кои „Олимпен“, „Фагерстахален“, „Рисбросколан“, „Скогслантан“, „Бјоркста“, „Престкраген“ и „Норбибакен“.

Министерот за правда, Гунар Стромер, изјави дека Владата внимателно ја следи ситуацијата.

„Информирани сме за сериозен инцидент во Фагерста. Полицијата е на терен и работи многу интензивно на случајот. Владата е во тесен контакт со полицијата и континуирано го следи развојот на ситуацијата“, рече тој.

Општина Фагерста соопшти дека ќе одржи прес-конференција на која ќе бидат објавени дополнителни детали.