Проруска хакерска група објави кибервојна против Норвешка 


Проруската хакерска група „Сервер килерс“ на Телеграм објави дека прогласила кибервојна против Норвешка, објави денес норвешкиот јавен сервис ТВ2, пренесува Анадолу.

„Причина за нападот: На 23 август Норвешка и Украина потпишаа нов договор за одбранбена и безбедносна соработка, со фокус на договорот за беспилотни летала, со кој Норвешка продолжува да ги зајакнува одбранбените капацитети на Украина преку програмата Нансен“, напишала групата во своето соопштение, според наводите.

„Сервер килерс“ се опишува како проруска хакерска група која е активна од 2023 година. Групата претходно ја презеде одговорноста за неколку слични кибернапади во август.

Нејзиниот канал на Телеграм, исто така, содржи неколку упатувања на друга хакерска група, „НоНејм057(16)“, според ТВ2.

Групата „НоНејм“ претходно ја презеде одговорноста за повеќе кибернапади врз норвешки цели и ги објавуваше своите активности на Телеграм.

Објавата дојде во време кога неколку јавни услуги во Норвешка се цел на кибернапади од понеделникот. Нападот врз Норвешката агенција за дигитализација (Дигдир) денес влезе во трет ден.

„Сè уште работиме на ограничување на последиците од тековниот напад“, изјави портпаролот на Дигдир, Аре Квистад, за ТВ2.

Квистад истакна дека огромното мнозинство жители и бизниси не се соочуваат со значителни нарушувања во функционирањето.

„Со други зборови, ниту едно општествено клучно решение не е засегнато“, рече тој.