Протести низ светот за солидарност со Газа

ВАШИНГТОН (АА) – Пропалестински демонстранти маршираа низ улиците и се собраа на плоштадите и пред конзулатите против тековната ситуација во Газа и американската поддршка за Израел, јавува Анадолу.

Студентите од Универзитетот Џорџ Вашингтон се собраа на протестен марш во Вашингтон. Веејќи палестински знамиња и извикувајќи разни слогани тие ја изразија својата поддршка за Газа.

Пропалестински демонстранти се собираа и пред американскиот конзулат во Амстердам, Холандија, против американската поддршка на Израел и против израелските напади врз Газа. За време на демонстрациите, про-израелски поддржувач ги нападна демонстрантите, кој потоа беше уапсен од полицијата.

Протести се одржаа и во мексиканската престолнина, Мексико Сити, со цел изразување поддршка за Палестинците.

Демонстрантите запалија свеќи и положија цвеќе во знак на солидарност со палестинскиот народ.

Над 700 Палестинци се убиени, а повеќе од 900 се повредени во израелските воздушни напади врз Газа од вторникот, со што е прекршен договорот за прекин на огнот и размена на затвореници што беше на сила од јануари.

Од октомври 2023 година, речиси 50.000 Палестинци се убиени, главно жени и деца, а над 112.000 се повредени во израелските напади врз Газа.

Меѓународниот кривичен суд во ноември минатата година издаде налози за апсење за израелскиот премиер Бенјамин Нетанјаху и неговиот поранешен министер за одбрана, Јоав Галант, за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.