Русија предупредува на нуклеарен одговор во случај на блокада на Калининград

Русија денес предупреди дека секој обид на Велика Британија или НАТО да го блокира Калининградскиот Регион ќе биде проследен со одговор со сите расположливи средства, вклучително и нуклеарно оружје, пренесува Анадолу.

Во соопштението објавено на Телеграм руската амбасада во Лондон го наведе ова реагирајќи на пишувањата во британските медиуми во кои се разгледува можноста за блокада на Калининград од страна на НАТО или непризнавање на рускиот суверенитет над регионот.

„Оние што се залагаат за планови за блокирање на Калининград или за напад врз него не треба да имаат никакви илузии за последиците. На секоја воена акција на Велика Британија или НАТО против руска територија ќе биде одговорено со сите средства што ѝ стојат на располагање на Русија, вклучително и со нуклеарно оружје“, се нагласува во соопштението.

Амбасадата повтори дека Русија „не бара конфронтација со НАТО и Европа и нема намера да ги нападне“, додавајќи дека оние што ќе изберат да иницираат таков конфликт „не треба да имаат никакви илузии“ дека Русија соодветно ќе одговори.

Калининградскиот Регион е руска ексклава во Балтичкото Море, сместена меѓу Полска и Литванија и одвоена од копнениот дел на Русија со територијата на Литванија.