Телата и посмртните останки на 105 Палестинци извлечени од урнатините во Газа

Телата и посмртните останки на 105 Палестинци беа извлечени од урнатините на станбена зграда уништена во израелските напади во централниот дел на Газа, по 17-дневна потрага, соопшти Цивилната одбрана, јавува Анадолу.

Семејствата се собраа во разурнатото подрачје Ал-Таџ за да ги идентификуваат и да се збогуваат со своите роднини, додека спасувачките екипи ги положија завитканите посмртни останки во редови меѓу урнатините.

Цивилната одбрана соопшти дека операцијата за извлекување била спроведена во координација со египетски комитет.

„Ова се цивили и човечки суштества кои имаат целосно право да живеат во мир и безбедност“, изјави за Анадолу портпаролот на Цивилната одбрана, Махмуд Басал, повторувајќи ги повиците за заштита на цивилите во Газа.

Меѓу присутните беше и Тагрид ал-Ханауи, чија ќерка, лекарката Алија Рамзи ал-Ханауи, беше убиена заедно со сопругот и четирите деца.

„Нивното семејство беше целосно избришано од матичната евиденција“, изјави таа за Анадолу.

„Денес раната повторно се отвори, но конечно успеав да ги прегрнам нивните посмртни останки и да ги погребам достоинствено“, рече таа.

Фаваз Зијара, роднина на жртвите и преживеан од областа, изјави дека околу 300 луѓе биле убиени кога станбениот блок бил погоден, додавајќи дека под урнатините и натаму има уште тела и исчезнати лица.

Израелските прекршувања на договорот за прекин на огнот од октомври 2025 година усмртија 1.431 Палестинец и ранија уште 5.026, соопшти вчера Министерството за здравство во Газа.

Од 8 октомври 2023 година, во геноцидната војна на Израел врз Појасот Газа загинале повеќе од 74.000 Палестинци, а над 175.000 се повредени, додека околу 90 отсто од инфраструктурата во енклавата се уништени.